Sjálfsútgefin fantasía

Bókaflokkur um sköpun og tortímingu

Lína Descret er íslensk myndskreytt fantasía sem sækir aðallega innblástur frá japönskum teiknimyndum (anime) og japönskum myndasögum (manga).  Bókin er sú fyrsta í fimm binda bókaflokki sem  fjallar um byltingu í heimi þar sem tortímendur eru kúgaðir af þeim sem sköpuðu þá, sköpurunum.  
 
Skaparar skapa tortímendur. Tortímendur eru kúgaðir í þessum heimi og lokaðir inni þar sem óttinn við mátt þeirra er afar mikill. Þann ótta má rekja til stríðs sem háð var á milli þessara tveggja tegunda fyrir um 1000 árum síðan. Sá ótti kemur þó ekki í veg fyrir að tortímendur séu notaðir sem þrælar skaparanna. En eingöngu eftir að hafa gengist undir stranga þjálfun í búðum fyrir tortímendur.

Ein af aðalpersónunum, Anna Fíl er þó undantekning þar sem hún er talin vera friðsamur tortímandi og fær því að ganga laus. Tortímendur mega alls ekki skapa og skaparar mega ekki undir neinum kringumstæðum tortíma.

Aðalpersónan er einstök í þessum heimi þar sem hún er hálfur skapari og hálfur tortímandi. Vegna lögmála þessa heims vekur þessi mótsagnakennda tilvist hennar upp andúð.

Með heiminn á móti sér, getur Lína Descret, eini skaparatortímandinn komið á friði á milli þessara tveggja tegunda og stöðvað þeirra eilifa stríð?

Bókin fæst í verslunum Eymundsson, Nexus, bóksölu stúdenta, Forlagsbúðinni á Fiskislóð  eða hjá höfundinum sjálfum.  Bókin er einnig til sem rafbók á www.emma.is.

Facebooksíðan:
http://www.facebook.com/pages/L%C3%ADna-Descret/226033340780609

Sýnishorn úr bókinni:
http://issuu.com/rosanovella/docs/l_na_descret-s_nishorn?mode=window&backgroundColor=%23222222

Gagnlegar heimasíður fyrir sjálfsútgáfu

Þar sem mjög lítið efni er til um sjálfsútgáfu á íslensku, er hér smá listi sem er þó engan veginn tæmandi en er fín byrjun.

www.rithringur.is

Systursíða critquecircle (http://www.critiquecircle.com/).  Netsamfélag þar sem hægt er að senda inn sögur til að fá gagnrýni, rýna aðra, lesa greinar, umfjallanir um bækur og margt fleira.  Ritsmiðja hefur svo verið haldin á vegum rithringsins í nokkur ár á bókasafni Kópavogs.

http://www.nanowrimo.org/en  (National novel writing month.)

Alþjóðleg keppni sem er í fullum gangi núna og gengur út á að skrifa 50.000 orð í einum mánuði, frá 1.nóvember til 1.desember.  Þetta snýst ekki um gæði heldur að klára eitthvað og það eru veglegir vinningar í boði fyrir þá sem ná orðafjöldanum.  Eins og til dæmis frá createspace.

www.createspace.com

Hefur verið stuðningsaðili nanowrimo í fjölda ára.  Sjálfsútgáfufyrirtæki sem bíður upp á að vinningshafar fái stafrænt eintak af bókinni sinni.  Í ár bjóða þeir í fyrsta sinn upp á fimm frí eintök á bókinni.  Það þarf ekki að vera handritið sem var klárað í nanowrimo heldur hvað sem er.  Gífurleg lærdómsreynsla af því að setja upp bókina sem getur hjálpað til við byrja sjálfsútgáfuna.  Mjög hvetjandi að sjá bókina sína á prenti.

Bjóða upp á tól eins og covercreator, þar sem hægt er að hanna kápuna sína frá grunni eða nota úr myndasafni þeirra.

http://www.12on14.com/site-images/build-your-book.pdf

Snilldarsíða sem kennir manni frá a til ö hvernig eigi að setja upp bókina sína.  Upplýsingar um spássíur, blæði, upplausn á myndum, breyta í PDF skjöl og margt fleira.  Þó að síðan sé aðallega hugsað til þess að hjálpa fólki við að setja upp bókina sína fyrir createspace, er engu að síður hægt að nota hana sem stökkpall fyrir aðrar sjálfsútgáfur.

Fleiri sjálfsútgáfur

www.lulu.com

Er sjálfsútgáfa rétt eins og createspace.  

http://www.blurb.com/

Sjálfsútgáfa sem sérhæfir sig í myndabókum.

http://www.publishislandica.com/index.htm

Íslensk sjálfsútgáfa.  Fullt af frábærum ráðum þar.  Allt frá vel heppnaðri fjölmiðakynningu til þess hvernig eigi að útbúa heimasíður með sem bestum árangri.

,,PublishIslandica gefur út bækur með gildi gamalkunnra hefða í bókaútgáfu að leiðarljósi. Allt of lengi  hafa útgefendur litið framhjá mörgum hæfileikaríkum og efnilegum rithöfundum, bækur þeirra hafa ekki hlotið náð fyrir augum útgefenda og hafa þar af leiðandi aldrei litið dagsins ljós.”

Það eru til fleiri íslensk sjálfútgáfufyrirtæki, Nykur, Rúnatýr, Óðinsauga og svo mætti lengi telja.


Uppfært!  Ekki mælt með því að nota þessa útgáfu til þess að gefa út, þekktir fyrir að hlunnfara höfunda sína en þeir eru tengdir við PublishAmerica.  Allavega eru PublishAmerica þekktir fyrir það, þori ekki að fullyrða um PublishIcelandica.  


Á hinn bóginn er hægt að nýta sér ráðin þarna að einhverju leyti.

http://www.issuu.com/

Vefútgáfa.  Hægt að birta bækur sínar þar.  Ókeypis upp að 500 síðum (100 mb).  Frábært til þess að birta sýnishorn úr bókum sínum eða kynna hana.

Bókamessan í bókmenntaborg

Þarna verður m.a kynning á sjálfsútgáfu fyrir þá sem hafa áhuga og tilboð á jólabókunum frá forlögunum.

BÓKAMESSA Í BÓKMENNTABORG

Glóðheitar bækur og fjölbreytt dagskrá í Ráðhúsi Reykjavíkur og Iðnó 12. og 13. nóvember

Helgina 12. – 13. nóvember standa Félag íslenskra bókaútgefenda og Reykjavík Bókmenntaborg UNESCO fyrir bókamessu í Ráðhúsi Reykjavíkur og Iðnó. Í fyrsta sinn er haldin glæsileg bókamessa hérlendis þar sem íslenskir útgefendur kynna nýja titla sem koma út nú fyrir jólin. Um leið verður fjölbreytt dagskrá fyrir fólk á öllum aldri í Iðnó báða dagana, bæði í stóra og litla sal. Einnig verður dagskrá í kaffihúsi Ráðhússins, Öndinni, og sögubíll Borgarbókasafnsins, Æringi, verður á svæðinu.

Meðal dagskráratriða í Iðnó má nefna „Græna sófann“, en þar fá ýmsir umsjónarmenn, svo sem Egill Helgason, Jórunn Sigurðardóttir og Druslubókadömurnar Kristín Svava Tómasdóttir, Salka Guðmundsdóttir og Hildur Knútsdóttir, til sín góða gesti og spjalla um ólíkar bækur. Sigurlaug M. Jónasdóttir kynnir matgæðinga og matreiðslubækur, Erla Hulda Halldórsdóttir sagnfræðingur ræðir við höfunda ævisagna sem byggja á rituðum heimildum og Jón Proppé listheimspekingur fer yfir íslenska listasögu á 50 mínútum. Leynifélagskonurnar Brynhildur Björnsdóttir og Kristín Eva Þórhallsdóttir sjá síðan um metnaðarfulla dagskrá fyrir börn.

Að auki verður boðið upp á upplestur, jóga fyrir börn, barnanudd og föndursmiðju, að ógleymdri vísindastund með Ævari vísindamanni. Áhugafólki um stjörnuspeki gefst kostur á að hitta Gunnlaug Guðmundsson stjörnuspeking, Kristín Tómasdóttir svarar spurningum stelpna frá A – Ö og svo mætti lengja telja. Kaffiveitingar verða á boðstólum í Iðnó og á Öndinni og gestir geta því átt notalega stund um leið og þeir kynna sér bókaútgáfu ársins í þessum tveimur byggingum við Tjörnina.

Nánari upplýsingar um messuna má sjá á vef Reykjavíkur Bókmenntaborgar UNESCO, www.bokmenntaborgin.is og þar er einnig hægt að nálgast ítarlega dagskrá.

Um leið vekur Félag íslenskra bókaútgefenda athygli á Bókatíðindum sem dreift verður inn á öll heimili landsins þessa dagana.

Kristján B. Jónasson kbjonasson@gmail.com - S. 8997839 Sigurður Svavarsson sigurdur@opna.is – S.

Auður Rán Þorgeirsdóttir audur.ran.thorgeirsdottir@reykjavík.is – S. 5901524 Kristín Viðarsdóttir kristin.vidarsdottir@reykjavik.is – S. 8634319

http://www.bokautgafa.is/images/stories/bokamessa_i_bokmenntaborg.pdf

http://bokmenntaborgin.is/

http://www.facebook.com/BokmenntaborginReykjavik

Tvær íslenskar fantasíur

Í ár koma út hvorki meira né minna en tvær alíslenskar fantasíur að erlendri fyrirmynd: bókin Fimm þjófar eftir Jón Pál Björnsson og bókaflokkurinn Meistari hinna blindu eftir Elí Freysson. Ég er ekki viss með Fimm hringa, en Meistari hinna blindu á að vera skrifuð meira fyrir ung-fullorðna (young adult) en fyrir börn, en lengi vel hafa fantasíur og ævintýri verið talin barnaefni hér á landi. Getur verið að loksins sé hinn þröngsýni íslandsmarkaður að opna sig fyrir alvöru fantasíum?

Upplýsingar um bók Jóns Páls má finna hér:

Fimm þjófar - Eymundsson

Upplýsingar um bók Elís má finna hér:

Meistari hinna blindu - Sögur útgáfa

Sýnishorn úr bók Elís má finna á þessari slóð:

Meistari hinna blindu - Sýnishorn

Líkaðu við Meistara hinna blindu á Facebook:

Meistari hinna blindu - Facebook

Þetta verða pottþétt jólabækurnar mínar í ár. Ég er ekki aðeins ánægð vegna þess að íslenski markaðurinn er að opna sig, heldur vegna þess að ég veit um marga sem hafa verið að skrifa fantasíur á Íslandi en hvergi fengið inni vegna hræðslu útgefenda við þetta bókmenntaform. Erlendar fantasíur, bæði á ensku og þýddar, hafa löngum verið að gera það gott hér á landi, og nú virðist sem við íslendingar getum farið að bæta okkar eigin fantasíum við.

Allir að styðja fantasíubyltinguna! Vantar þig góðar jólagjafir, eða eitthvað bitastætt að lesa?

Vertu með!
Keyptu eintak ;).

Myndrænar skáldsögur - nýtt skáldsagnaform á Íslandi

Ath. Þessi dagbókarfærsla er tekin af blogginu www.123.is/ynra og sett hér inn til dreifingar. Upphaflega birt 06.11.2011.

Ég hef breytt fyrri bloggfærslu um bókina Línu Descret eftir Rósu Grímsdóttur og Meistara hinna blindu eftir Elí Freysson (sem nú er umfjöllun um Elí og Fimm þjófa eftir Jón Pál Björnsson). Ástæðan er sú að fyrrnefnd bloggfærsla er um íslenskar fantasíur; flokk sem bæði Meistari hinna blindu og Fimm þjófar passa í, en Lína Descret ekki.

Málið horfir þannig við: Lína Descret er ekki fantasía. Hún var í upphafi talin slík vegna þess að af þeim skáldsagnategundum sem þekkjast hér á landi er fantasía sú eina sem Lína Descret gæti fallið undir. Kaupendur sögunnar ættu þó alls ekki að búast við týpískri evrópskri fantasíu; sagan er undir djúpstæðum japönskum áhrifum. Hún er í raun íslenskuð útgáfa af svokölluðum Light Novel, eða myndrænum skáldsögum eins og það gæti heitið á íslensku. Þessi bókategund er nokkurs konar millivegur milli myndasagna og skáldsagna: bækurnar eru ríkulega myndskreittar, áhersla lögð á samtöl frekar en lýsingar og einnig fer Rósa mjög frumlega leið í textauppsetningu, en segja má að textinn lýsi andrúmslofti myndasagna en sé þó skáldsagnatexti. Þetta er áhugavert bókmenntaform og sagan Lína Descret áhugaverð saga. Ég mæli heilshugar með henni fyrir áhugamenn anime og manga, fantasíuaðdáenda og í rauninni allra sem eru tilbúnir að kynna sér áður óþekkta bókmenntagrein. Sagan hefur yfir að ráða húmor og léttleika í bland við mikilvæg málefni og spurningar sem koma við okkur öll; yndisleg samblanda að fyrirmynd meistaranna góðu í Japan.

Bókaflokkurinn um Línu Descret verður fimm bóka flokkur og ekki nema von þar sem sagan er flókin og fer djúpt. Höfundi tekst þó að greiða úr flækjunni; lesandinn er leiddur af öryggi í gegn um óþekktan heim þar sem fordómar, valdagræðgi og hroki bærast undir yfirborðinu. Aðalpersónan er Lína Descret, stúlkan sem bókaflokkurinn heitir eftir. Hún er unglingsstúlka í heimi þar sem menn fæðast í þrjá flokka: menn án krafta, skapara sem geta skapað hluti úr engu og tortímendur sem geta eytt hlutum með huganum einum saman. Heimurinn er ungur: borgin Create, helsta sögusvið bókanna, er til að mynda ekki nema 1000 ára gömul. Að sama skapi eru mennirnir óþroskaðir og fordómafullir. Löngum hefur stríð ríkt á milli tortímenda og skapara en á tímum bókarinnar hefur það stríð farið úr böndunum. Skaparar hafa náð yfirhöndinni og vegna hræðslu og fordóma þeirra eru tortímendur annaðhvort neyddir til að vera þrælar eða hýrast í vinnubúðum við lélegan aðbúnað.

Þar kemur Lína Descret inn í myndina. Hún er nefnilega sú fyrsta í heiminum til að fæðast með bæði tortímenda- og skaparamátt. Auk þess að takast á við unglingsárin, ástina og fullorðna fólkið dregst Lína inn í aldagamla baráttu tortímenda og skapara. Vegna þess að hún er öðruvísi en allir aðrir finnst henni hún hvergi passa inn í, hvergi eiga heima, en finnur sig fljótt á bólakafi í baráttu sem gæti breytt heiminum...

Lína Descret er ekki bara ótrúlega hugvitsöm saga. Hún er saga um ástir, fjölskyldubönd, einelti, fordóma, valdagræðgi, pólitík og margt fleira. Þess má geta að höfundur sögunnar, Rósa Grímsdóttir, skrifaði hana á tímabili atvinnuleysis og er þetta fyrsta bók hennar. Hún hefur lokið fyrstu skrifum alls bókaflokksins og auk þess myndskreitt, yfirfarið og gefið út fyrstu bókina sjálf. Þar með uppfyllti hún margra ára gamlan ritlistardraum. Rósa ákvað að gefa bókina út í sjálfsútgáfu í stað þess að leita á náðir útgefenda vegna þess að ritstíllinn er alls óþekktur á Íslandi og hún óttaðist að forlögin myndu reyna að breyta sögunni í eitthvað annað en hún er.

Einnig má geta þess að sumt efni bókarinnar er ekki við hæfi ungra barna. Hæfilegur aldur lesenda væri ef til vill 14 og upp úr, þó þroskaðir yngri lesendur gætu einnig haft gaman af.

Ég hef fylgt þessari sögu eftir í svolítinn tíma og kolfallið fyrir litríkum persónum Rósu, flóknum sögufléttum og kímnigáfu. Langar þig að prófa? Hægt er að kaupa bókina beint af höfundi á netfanginu: rosagrims@gmail.com Bókin er í kiljuformi, kostar 2.500 kr, er 546 blaðsíður og, eins og áður hefur komið fram, ríkulega myndskreitt.

Sýnishorn úr bók Rósu má finna hér:

Lína Descret - sýnishorn

Líkaðu við bókina á Facebook:

Lína Descret - Facebook

Skoðaðu bloggið! Þar má finna persónuupplýsingar, hugtakalista, aukaefni o.m.fl.

Lína Descret - blogg

Það verður áhugavert að sjá hvernig íslendingar taka í þetta ókunna skáldsagnaform. Ég er persónulega mjög spennt fyrir opnari markaði á Íslandi og langar að sjá fleiri skáldsagnaform í umferð hér. Á Ísland ekki að heita bókmenntaland? Hvers vegna hjökkum við þá alltaf í sömu bókmenntaformunum?

Fylgist með Rósu Grímsdóttur frá byrjun og nælið ykkur í áritað eintak!

Í árdaga...

Fyrir tíma rafljósins þ.e. ljósaperunar þá voru bækur lesnar án þeirra þæginda sem við höfum í dag. Flestir hafa þá kannski setið úti og lesið í dagsbirtunni og ekki getað notið þeirra gæða sem við erum svo vön. Gæða eins rafmagns, ljósaperu og tölvu, allt eru þetta gæði sem fólk á öðrum tíma gat ekki fengið að njóta.

Við njótum því foréttinda í dag, sem þekktust vart á öðrum tímum. Sjaldan höfum við haft aðgang að jafn miklum upplýsingum og raun ber vitni. Internetið og veraldarvefurinn gefa okkur kost á að njóta þeirra til fulls. Áður fyrr þurfti fólk að hafa sérstök réttindi til að geta fengið að lesa og skrifa bækur, það fengu nefnilega ekki allir að læra að lesa, þótt ótrúlegt megi virðast.

Það fengu nefnilega bara ákveðnar stéttir, sem hægt er að segja að hafi verið ráðandi stéttir og gátu þeir myndað skoðanir fólks á þeim raunveruleika sem það lifði í. Það fengu ekki allir að ganga til náms og í mörgum löndum voru það prestar og aðalsmenn af hærri ættum. Þótt við höfum þennan rétt í dag, þá virðast ekki margir gera sér grein fyrir hve mikils virði hann er.

Á hverjum degi erum við mötuð af alls konar upplýsingum um það hvernig heimurinn er, eða hvernig fjölmiðlarnir vilja að við sjáum heiminn. Líkt og hinar ráðandi stéttir fyrr á tímum vildu móta skoðanir fólks á raunveruleikanum, þá eru fjölmiðlarnir í dag í líku hlutverki. Þeir vilja móta skoðanir okkar á raunveruleikanum og hafa áhrif á hvernig við hugsum.

Það sem við hugsum hefur líka áhrif á þarfir okkar, eða það sem við höldum að við þurfum. Flest viljum við fá upplýsingar um það sem er að gerast í heiminum og í dag kallast það fréttir. Fjölmiðlarnir þurfa að hafa tekjur og eru sumir þeirra "ókeypis", en með auglýsingar af hlutum sem við "þurfum". Hlutverk gæsalappana er til gera ljóst að hlutirnir eru ekki alveg eins og þeir sýnast.

Við þurfum nefnilega ekki alls sem þeir segja að við þurfum, eða að vera eins og þeir láta í ljós. Fjölmiðlarnir eru hins vegar að breytast fyrir tilstilli Internetsins og í dag getur hver sem er komið skoðun sinni á ákveðnu málefni á miklu auðveldari máta enn nokkurn tíman hefur verið hægt. Áður fyrr þurftu greinar sem voru skrifaðar af blaðamönnum að fara í gegnum ritstjóra sem ákvað hvaða greinar voru birtar í fjölmiðlinum.

Í dag getur hver sem er sest niður og komið skoðun sinni á framfæri á hvaða málefni sem er. Þú gætir skrifað bók, búið til tónlist eða tekið upp mynd og komið efni þínu á framfæri til mjög stórs markhóps eða lítils, án þess að vera stór fjölmiðill eða útgáfa. Það væri hægt að segja að þetta sé stundin þín til að koma skilaboðum þínum á framfæri. Hvað vilt þú segja, eða koma á framfæri ?